هو في ايه ؟؟؟

يوم الأربعاء الموافق 13 سبتمبر 2006

برنامج / العاشرة مساء

استضافة منى الشاذلي الإعلامية / أبلة فضيلة .. و هي إعلامية تخصصت في برامج الأطفال و كان ليها برنامج في الإذاعة المصرية اسمه / غنوة و حدوتة ... أبلة فضيلة فعلا شخصية تحس انك عارفها و قد ايه فعلا طيبة و عفوية و زي ما هي قالت الطفل اللي جواها لسه صغير و بيحب يضحك و يجري و يلعب .. بما إني مش اتربيت في مصر فأكيد مش سمعت البرنامج بتاعها ده ... بس حاجة جميلة حصلت في الحلقة ده .. من ضمن المكالمات اللي جت على الهوا كانت مكالمة من واحد اسمه / أحمد ... في أول كلامه قال بحبك بحبك بحبك يا ابلة فضيلة .. اللي شاف البرنامج و سمع المكالمة زيي أكيد هيتأكد الانسان ده قد إيه كان صادق في كلامه و في كل كلمة قالها لأبلة فضيلة لدرجة ان هي نفسها عينيها دمعت من كتر كلام الحب و الامتنان و التكريم اللي قاله أحمد عليها ... ساعتها استغربت اوي الدنيا لما سالته منى الشاذلي اذا كان يعرفها معرفة شخصية ... و ساعتها قال لأ كل العلاقة اللي تربطني بيها هي صوتها من خلال الراديو .. هو ده فعلا اللي شدني و خلاني استغرب قوي ... لأ مش عشان هي مش تستاهل ... استغربت ان ممكن الواحد يفضل فاكر حد و يبقى بيحبه كل الحب ده من خلال صوته بس ... في حين ان في ناس كتير بنقابلها ف يالدنيا و نعرفها و تجمعنا بيها ما يسمى بالعلاقات الانسانية و مع ذلك يوم ما نختلف معاهم ينسى كل ده و لما تيجي تقلهم افتكروا لي حاجة كويسة ... تلاقي الصمت خيم على الحوار و كأن طول علاقتك بيهم مش كان فيها أي حاجة كويسة.

طبعا الناس هتقولي ده العادي و كبري دماغك و انسي و الناس ده مش تستاهل .. ماشي كلامكم صح .. بس ازاي اللي بيحب ممكن في أيام يكون قاسي أو يكره ... و ليه بيخليني اسال اكثر ليه يحصل كده ... ثبت علميا ان اختلاف وجهات النظر و الرأي ظاهرة صحية .. و في الفيزياء اختلاف الأقطاب يحدث تجاذب ... بس عمري ما كنت اعرف ان الاختلاف ممكن يخلق قسوة و كره و ينسينا ان اللي احنا بنقسى عليهم دول كانوا في يوم من الايام أقرب الناس لينا ... كان في حكمة زمان بتقول فيما معناه ان حتى لو اختلفنا مش لازم نموت او نخسر كل حاجة .. و انا مقتنعة ان كل الناس المفروض يتعاملوا كده مع بعض .. بس مش عارفة ليه الناس مش عايزة تفهم كده ... انا قالبت ناس كثير جدا و طبعا على قد ما كانوا كثير على قد ما كانوا مختلفين معايا في حاجات أكثر .. ما افتكرش اني في يوم من الايام قسيت على حد او كرهت حد لمجرد ان احنا مختلفين في اي حاجة ... حتى الناس اللي قطعت معاهم لانهم كلنوا عايزين يفرضوا عليا ارائهم و قراراتهم ... الناس ده لحد النهارده بقابلهم و بتكلم معاهم بكل ذوق و احترام ... يعني لا كرهتهم و لا كنت ناشفة معاهم ... و حتى لما كنت بتعامل معاهم رسمي ( على راي ناس اعرفهم ) كانت فعلا معاملة رسمي كلها ذوق ... على اساس ان الناس ده مهما حصل برده كانت بينا عشرة و عيش و ملح ... و آه لو الناس فعلا تقدر الحاجات ده

طبعا الحياة مش هتقف عند حد .. و اكيد ياما هنشوف طول ما احنا لسه عايشين .. و يمكن مع الوقت هبطل اسأل هو في إيه .