حمد لله على سلامتي من بدري

طبعا من بدري لأني سبت مصر يوم 28 فبراير و ده أول حاجة اكتبها من ساعة ما وصلت الكويت ... جايز لأني جيت على شغل على طول و فعلا من كتر الشغل مش شايفه ادامي ، و جايز عشان ماكنش ليا نفس اكتب بالرغم ان كان في مليون حاجة أكتب عنها ... مش عارفة بصراحة اي سبب اللي ييجي قبل التاني ، بس المهم انها طلبت اوي معايا اني اكتب النهاردة .. و بيني و بينكم مش عارفة اصلا انا عايزة اكتب عن ايه ... بس اللي يلاقي لخبطة في الافكار يعمل نفسه مش واخد باله بالمرة .

النهارده طبعا عيد الأم ... و طبعا مش جبت هدية ... او بمعنى اصح انا مأجلة موضوع الهدية ده شوية .. يعني اكيد الناس عارفة الظروف .. بس بجد في اليوم ده و السنة ده بالذات فارق معايا اوي .. يمكن حاسة بيه أوي و كان نفسي اكون مع ناس كتير في اليوم ده .. بس عارفة انه مش هينفع ... بس اللي نفسي اعمله دلوقتي و ان شاء الله اقدر اعمله النهاردة او بكرة اني اروح المكان اللي برتاح فيه و اتكلم فيه براحتي .. عشان فعلا عندي كلام كتير محتاجه اقوله .

راني اختي وحشاني اوي جدا ، كان نفسي الاجازة تطول معاها اكتر من كده بس عادي بقى ربنا يجمعنا على خير ، و طبعا اصحابي كلهم وحشوني اوي ، سيكا صحبتي اتقرت فاتحتها و احتمال تعمل الشبكة و برده مش هاحضرها بس انا فعلا مبسوطة ليها اوي هي و محمد ، في مصر انا و اصحابي اتجمعنا و احتفلنا سوا بعيد ميلادي الــ 25 في الأزهر بارك ،و بالرغم ان في شوية حاجات دايقتني بس اجمالا اليوم كله كان مسخرة جدا و الصور كانت جامدة اوي .. عارفة ان في حاجات كتير كان المفروض اعملها في الاجازة و مش عملتها ، و كان في ناس المفروض اشوفهم و مش شفتهم ، و في حاجات عملتها بالغصب و بالاكراه ، بس لكل الناس اللي كان نفسي اشوفها بقولهم ، انا فعلا مكنش عندي وقت خالص هما كانوا 14 يوم و عدوا هوا، بس اكيد ان شاء الله هاعوض عليكم جميعا .. و يا رب ما حد يزعل مني ابدا .

من فترة كده كنت مضايقة اوي و بيني و بينكم نوعا ما دلوقتي برده مضايقة ، بس احمد ربنا الف مرة ان شغلي واخد تقريبا كل وقتي ، حتى احيانا لازم اخد شغل معايا البيت و اكمله ، و حتى لو مش شغل ليا فانا بضيع وقت في شغل لماما ، و بعدها بانام مقتولة او ممكن انزل شي ساعة ... بحاول على قد ما اقدر انسى زعلي .. و الحمد لله نجحت لحد كبير و يا رب افضل على كده.

حاجة كمان غريبة .. انا بقيت بآكل كتير جدا ... مش عارفة ده مرتبط بحالة الضيق اللي عندي و لا لأ ... بس بقيت باكل بشراهة .. بس مش حاسة بانعكاس الاكل ده عليا لا سلبا و لا ايجابا .. بس هو الموضوع نفسه كان غريب عليا خصوصا اني بقالي كتير اوي مش باكل بالكمية ده ... ربنا يستر بس و مش ارجع زي زمان تاني .

كان نفسي أروح البحر اول ما وصلت الكويت ، و الاسبوع اللي فات رحت مع ماما و اتمشينا و المية غرقتني .. كنت سرحانة كتير .. عنيا تضحك ساعات .. و قلبي يحزن ساعات .. افتكرت حاجات كتير و انا على البحر ... حاجات رغم انها مشيت و مش راجعة تاني بس لسه بفرح بيها .. و لسه كل ما افتكرها اضحك ضحكة بريئة .. انا حتى افتكرت رسايل كانت جتلي برده و انا على البحر مرة .. و من كتر ما ضحكت ماما فكرتني اتجننت رسمي و بكلم نفسي .

انا عندي صداع جامد اوي دلوقتي .. و بدأت اتعاطى مع الأدوية و البندول بغباء .. بالرغم ان ده عمره ما كان طبعي .. من الواضح ان في حاجات جديدة هبدأ اعملها .. و في حاجات تانية لازم اخفف منها

يا رب اشوفكم على خير تاني ... و لكل الناس .. انا بحبكم اوي و وحشتوني اوي و اسفة بجد لو قصرت في حقكم في يوم من الأيام