كــــداب كــبــــيـــــــر
" صوتك أرق من النايات ... صوتك غنى مالي السكات "
صدقيني أنا دلوقتي مش بأحس بيكي ، زمان كنت بأكون مبسوط و أنا معاكي ، دلوقتي مبقاش ده موجود ، صوتك كان بيحييني ، كان بينسيني دنيتي كلها لما بس تقوليلي " بحبك " ، دلوقتي بقيت مش بصدق حتى صوت وجعك ، بقيت أحس إني مقيد و إنت اللي مقيداني
" و مين غيرك بيفهمني من النظرة اللي في عيوني .. و مين غيرك بيقبلني و يتحملني بجنوني "
إنت اللي ربطاني و مسلسلاني و مع ذلك عايزاني أكون معاكي حر طليق ، إزاي بقيتي آخر واحدة ممكن ألجأ لها بعد ما كنتي الوحيد اللي بتفهمني حتى من غير كلام ، بحاول أكون لك اللي إنت عاوزاه ، بس بأحس إني بأخسرك أكثر ، صدقيني أنا حتى ما بقتش عارف أنا بحبك و لا لأ ، بقيت حاسس إني تايه معاكي أكثر ما كنت تايه من غيرك
" معاك هأقدر أمشي و أكمل ... و لو مين جرحني هأتحمل ... علشان عيونك يا حبيبي ده أنا أموت بجد و لا أسيبك ... يا نور عيني"
كنت تايه و فجأة لقيتك في حياتي من غير سابق إنذار ، و حسيت إني مش عايز غيرك ، و لما كنتي بتقوليلي إنت نور عيني كنت بقولك إنت الهوا اللي بتنفسه ... بس تخيلي بقى لما أكون مش عايز خلاص أتنفسك .. قدرت استغنى عنك ... عيونك ما بقتش بتأثر فيا .. و صلت إني أكون معاكي و كأنك مش معايا .. قدرت خلاص أكون بعيد .. بقيتي مش فارقة كثير صدقيني
" متصدقنيش لو قلت نسيت ليلة واحدة من لياليك ... متصدقنيش ده أنا قلبي بيجري على اي واحد يشبه ليك .. يا حبيبي القلب اللي اختارك من بعدك عايش على نارك ... مستني تخلص مشوارك .. ده مكانك فاضي و مستنيك "
لو سمحتي حبيبتي متصدقيش كلامي ... إنت عرفاني في كل اللي قلته كداب كبير بس الخط الأحمر ما بيكدبش
