وظيفة خالية ... بس مش خالية الدسم أكيد

الايميل ده وصلني من صديقي العزيز ( حسين مجدي ) و موتني ضحك و قلت يمكن يضحك ناس غيري بعد كمية الكآبة اللي الناس عايشاها في كل حتة ، و اللي بين قوسين ده كانت تعليقاتي أنا

تعلن رئاسة جمهورية ( مصر ) العربية عن حاجتها لمن يشغل منصب رئيس الجمهورية ( لو صدقت يبقى انت قادر على تنويم نفسك مغناطيسيا و بكده تكون استوفيت شرط من الشروط اللاحقة .. الف الف مبروك يا سيد العاقلين و بالشفا )

شروط الحصول على الوظيفة :

1 - السن فوق 70 سنة ( اللي هو سن الضياع يعني أمال هنخربها ازاي )

2 - خبره 20 سنة في منصب مشابه - يفضل من له خبرة في جمهورية ( مسر ) العربية ( اللي ليهم خبرة اتكلوا خلاص .. فاضل مين يا ترى و ليه خبرة !! منكم و اليكم نعود ) أو أي دولة غير ديموقراطية ( أه غير ديموقراطية عشان احنا اتعودنا على كده و مين فات قديمه تاه )

3 - القدرة على التنويم المغنطيسي ( لا تعليق .. مش احنا قلنا انك عديت الشرط ده خلاص و لا هي شغلانة بقى )

4 - أن يكون له كرش ( طبعا أمال هيودي اللي هينهبه فين و طبعا العينة بينة عندنا )

5 - أن يكون له أبناء قادرين على حكم مصر من بعده ( و هو في زي جيمي اسم النبي صاينه و حارسه )

6 - الغباء الاقتصادي و القدرة على اهدار نصف موارد مصر و تسليك النصف الثاني ( الحمد لله البلد مش فيها اكثر من دول اللي هما نتاج الوضع الحالي .. ناس ذوق ذوق ذوق صراحة )

7 - (الشرط ده انا نسيته و اللي فكرني بيه كثر خيره الأستاذ فارس ربنا يفكره دايما بالخير و يجعله دايما زخرا للوطن )الشروط ناقصه يا أستاذه .. لازم يكون متجوز حرمه لئيمه و خبيثه و عضوه فى الروتارى اللى هو المجمع الماسونى .. و يكون زى الشراب فى أيدها .. تفرده و تتنيه .. و تغسله و تكويه .. و كده يعنى

مميزات الوظيفة :

1 - مرتب فلكي ، ده غير التأليب والتهليب و أنت و شطارتك بقى ( و بما اننا من انصار ان التجارة شطارة فاكيد مش هتلاقي احسن من كده تجارة)

2 - حصانة .. يعني ماحدش يحاسبك و لو عملت حاجة غلط هاتها في أي وزير و لا أقولك نفض و احنا هنعديها ( هو احنا لينا غير ريسنا .. و لو احنا مش عديناله مين بس يعديله .. أكيد مش لجنة حروق الانسان على راي اللمبي )

3 - التشريفة .. تقفل كل الشوارع لو هتعدي ، و لو مش هتعدي نقفلها برده ، امال نبيع أدوية ضغط ازاي فتح مخك بأه ( هي ده النظرة العلمية المعملية الفذة .. لازم لما تضرب تلاقي )

4 - أمان وظيفي .. مش هتسيب الكرسي إلا ميت ( و اللي يقولك ديموقراطية .. قله شعبي شعب طيب مهاود جميل بيركن الحمار مكان ما يعوز صاحبه .. و مفيش سوسو و لا نادية ..هي فوزية و بس و ابقى سلملي على الديموقراطيه )

5 - بس كده بلاش طمع ( عايز الناس تقول علينا ايه فاتحنها ع البحري لكل من هب و دب لا ده حتى كده يبقى عيب في حقنا )

ملحوظة هامة :

اي حد مش كامل الشروط و بيفكر يرشح نفسه سيتم تلفيق أي تهمة ليه و اعتقاله .. و سلملي على أيمن نور ( وقد أعذر من أنذر )

و عشان يكون زي ايميل تاني :

قم بارسال هذه الرسالة ل 10 من اصحابك تصحى تلاقي نفسك رئيس .. و لو اهملتها و لم ترسلها توقع زيارة من أمن الدولة خلال 10 ثواني ( انا فعلا بتنرفز لما بلاقي الملاحظة ده في اي ايميل و بحس ان حتى التدخل وصل لدرجة اجبارك انك تبعتها تاني لمين و لو مش بعتها و نفضت اكيد اكيد هتروح النار )

ملحوظة :

في واحد اسمه أنور السادات لم ينشر الرسالة وجد مقتول على المنصة يوم 6 اكتوبر 1981

و النائب بتاعه كان شاطر و بعت الرسالة

و الباقي احنا عارفينه ... ( النائب اكيد بعتها ل 10 بس يا ترى يا هل ترى مين العشرة دول بقى ؟؟؟ )

لك الله يا مصر على رأي الحاج جرجس