ببساطة كده و بكل وضوح *
مش عارفة ليه اول ما سمعت الاغنية ده .. حسيت قد ايه فعلا الدنيا مهما قسيت علينا بترجع تاني و تحلى في عنينا ... ممكن بابسط الحاجات فعلا نرجع نضحك من القلب .. ترجع عنينا تلمع من تاني .. يرجع ايمننا بحاجات ممكن في لحظات اليأس نكون فقدنا الايمان بيها .. ازي ممكن يمر على الواحد أيام يحس انه خلاص مش بقى في حاجة واضحة .. و بقى اللون السائد هو الرمادي .. حتى الاسود مش طايله ... و مش فاهم ليه كل ده بيحصل ... و مش عن ايمان قوي يقول الحمد لله .. و واحدة واحدة يرجع ايمانه تاني و برغم كل شيء يقول الحمد لله على كل شيء
الكام يوم اللي فاتوا كانت نفسيتي مش متضبطة .. و مش في سبب معين للحالة ده .. بس فعلا حسيت اني مخنوقة جدا و مش فاهمة و لا متسوعبة أي حاجة .. و يمكن حاولت امنع دموعي كثير .. بس جيت في الآخر و عيطت اوي وو بكيت بحرقة .. بكيت كأني عمري ما نزلت دمعة قبل كده من عيني .. والدي كان واحشني اوي امبارح(والمهندس ربنا يخليه ليه بوست لوحده) .. لحد ما في لحظة اتقلب الحال .. لما تحس انك عطشان أوي و فجأة من غير ما تحس تلاقي العطش راح .. و الدنيا رغم انها برد بس انا حسيت بالدفا كله .. رغم لبس البيت الشتوي حسيت أني أميرة ... بعد الخوف اللي كنت حاسة بيه لقيت بر أمان أرمي عليه حمولي .. احساس يمكن لو فضلت أكتب عنه مش ممكن هاعرف اوصفه برده .. احساس ان الدنيا فعلا رجعت بمبي في عيني .. لسه في خير في كل الحاجات اللي بتحصل .. لسه ايماني ان ربنا بيحبني موجود .. لسه ثقتي في أني ممكن احقق أي حاجة موجودة ... حتى الدموع اللي نزلت بحرقة اتبسطت بيها ... بعد كذا يوم حسيت أني بجد مبسوطة .. مهما كان تعريف السعادة و المقصود بيها .. أنا حسيت كل المعاني بتاعتها .. رجعت آكل عنب أحمر و أنا نفسي مفتوحة ... شربت النسكافيه البلاك و أنا شابفاه أصفى من اللبن ... أكلت الشوكلاته بكل مزاج و متعة
و عشان كل الحاجات .. لما سمعت أغنية أنغام حسيت تاني بيها و قلت هي ده الدنيا حلاوتها تيجي مع مرارتها و هي ده كلمات الأغنية اللي قد ما هي بسيطة وعلى قد ما هي رقيقة إلا ان أثرها في النفس أكيد بيفرق كثير
ببساطة كده و بكل وضوح .. أنا عايشة كده بقلبي المفتوح
ع الناس و العالم كله .. و بنادي زماني و اقول له
أنا كلي شباب و أمال و طموح
و هروح يا زمان مطرح ما تروح
هاشوف وياك افراح و جروح
كل ده عارفاه كل ده مسموح
ببساطة كده
انا وحدة مليش تجربة .. اسالتي بلا أجوبة
الدنيا قالوا متعبة .. لكن عندي استعداد
اركب مركبة في الفضا .. و اغوص في بحور الندى
و القى لندايا صدى .. لو بيني وبينه جبال
انظر و اسمع و اطرح و اجمع
و انزل و اطلع و انجح و ألمع
أنا قلبي ملوش مشكلة .. يعيش مرحلة مرحلة
و اديني بقول ع الملا .. ما بخفش من الايام
بتعلم منها قوي ... و تعلم فيا قوي
لكن انا قلبي قوي .. يتحمل اي الام
اعتب و احكي و اغضب و اشكي
و اتعب و ابكي و اعلن ضحكي
أنا كلي شباب و أمال و طموح
و هروح يا زمان مطرح ما تروح
هاشوف وياك افراح و جروح
كل ده عارفاه كل ده مسموح
ببساطة كده و بكل وضوح
* ببساطة كده - أنغام أغنية قديمة شوية
