Happy Valentine's Day Guys

Hello - Lionel Richie

I've been alone with you inside my mind

And in my dreams I've kissed your lips a thousand times

I sometimes see you pass outside my door

Hello, is it me you're looking for

I can see it in your eyes

I can see it in your smile

You're all I've ever wanted

and my arms are open wide

Cause you know just what to say

And you know just what to do

And I want to tell you so much, I love you

I long to see the sunlight in your hair

And tell you time and time again how much I care

Sometimes I feel my heart will overflow

Hello I've just got to let you know

Cause I wonder where you are

And I wonder what you do

Are you somewhere feeling lonely

or is someone loving you

Tell me how to win your heart

For I haven't got a clue

But let me start by saying, I love you

Hello, is it me you're looking for

Cause I wonder where you are

And I wonder what you do

Are you somewhere feeling lonely

or is someone loving you

Tell me how to win your heart

For I haven't got a clue

But let me start by saying ... I love you

إثــنــيــن في واحــــد

طيب عشان كنت وعدت حفصة و زنزانة اني أرد على التاج اللي عدوه عليا ، و النهاردة في ذكرى بحبها و عايزة اكتب عنها سطرين كده على الماشي فقررت اني ادمج الاتنين مع بعض و اتوكل على الله .. حلو الكلام .. طيب تمام .. هبدأ الأول بالذكرى

------------------------------------------------------------------------------------

زي النهاردة سنة 2002 كانت هي بنت عادية و هو شاب عادي برده .. بينهم صداقة جميلة و تفاهم أجمل .. هي كانت بترتاح في الكلام معاه و بتضحك من قلبها على كلامه و مواقفه .. هو كان كوميدي اووي و اكتر حاجة كان بيحب يعملها انه يشتغلها .. هي الوحيدة اللي كان ممكن تخرج الطفل المجنون اللي جواه ... زي النهاردة قابلها .. في مكان ما في مصر الجديدة .. كنت حاسة بالقلق اللي هي فيه و هي نازلة تقابله و مكناش عارفين القلق ده ليه ... و راحت البنت الجميلة و قابلت الشاب الوسيم .. و بعد السلام و الكلام اخيرا قالها بحبك .. البنت الجميلة عيطت .. و هو استغرب و قالها في حد يعيط لما يعرف ان في حد بيحبه .. هي عيطت عشان حست قد ايه ربنا بيحبها و انه جزاها خير بالرجل ده ... بدأت قصة حبهم الجميلة من يوميها و يمكن حتى من قبلها بس من غير تصريحات .. و النهاردة البنت الجميلة و الرجل الطيب بقى عندهم ولدين يجننوا و يخطفوا القلب و بينسوني الدنيا لما بشوفهم .. كلمتهم دلوقتي و قلتلهم كل سنة و انتم طيبين ، قلتلهم قد ايه بحبهم ، ضحكتهم و صوتهم نسوني حاجات كتير و أثبتوا لي حاجات تانية.. ربنا ما يحرمهم من بعض و مش يحرمني منهم أبدا .. وحشتوني أوووووووووووي

--------------------------------------------------------------------------------------

نيجي بقى لتحقيقات أمن الدولة اللي عملتهالي كل من المدعوة حفصة و المدعوة زنزانة .. و نبدأ المحضر في ساعته و تاريخه و أقر انا المجاوبة أدناه اني سأحاول أن أكون صريحة قدرالامكان

ماذا سيحدث لايميلك بعد موتك؟ بصراحة مش عارفة بس هو عامة كل الحاجات اللي كتبتها سواء على البلوج او في يومياتي الورقية هتكون من نصيب اختي الجميلة راني و هي تعمل فيها اللي هي عايزاه .. الا لو كنت اتجوزت مثلا و لا حاجة شبه كده فأكيد هتكون من نصيبه .. بس اكيد هوصيها او هوصيه انه لو حصلي حاجة فعلى الاقل تنزل الخبر ده في البلوج عشان تقرولي الفاتحة و تدعولي و ده مش يمنع انكم دلوقتي برده تدعولي و تكتروا منها لوسمحتوا

هل اعطيت كلمة المرور او كلمة السر لاحد من قبل؟ لأ محصلش الكلام ده .. بس ارجع و اقول ان كل كلمات المرور بتاعة كل حاجة في حياتي لازم تكون مع راني أختي رغم انها مش بتستخدمها خالص .. بس بعمل حساب السن و الزهايمر

اذا كانت الاجابه نعم ،فما كات طبيعة علاقتك به ؟ اللي هنقوله هنعيده .. ما قلت راني اللي هي اختي و صحبتي و سر سعادتي و سر عصبيتي

اسم الدلع المعروفة به بين اصحابي؟ خلينا في اسم الدلع لأن اسمي الأصلي قربت ألغيه أصلا .. يمكن بس بستخدمه في الشغل و المعاملات الرسمية و عند بابا و ماما .. غير كده بقى اسمي المعروفة بيه بين اصحابي ريكـا .. بس في اسماء كتير غيره .. يعني اي حد أعرفه ممكن يطلع اسم ليا على مزاجه .. اخواتي البنات بيقولولي رووك او ريكو .. اخويا الكبير كان زمان يقوللي يا تخينة او يا بطاطس و بالرغم اني مش بقيت كده خالص هو برده مصر يندهني بالاسم ده .. باقي الاصحاب بقى في اللي بيقولي بطوط او بطة .. اللي بيقولي مريم او ماريام .. ناس كانت بتندهني مرمر .. ريمي .. مير .. روكا .. بس من أحلى الأسماء اللي اتندهت بيها هو الاسم اللي اطلقه عليا مصطفى ابن اختي كان بيقولي مـيــم و احيانا مـيــمــا ... طبعا مع احتفاظي بالحق في الاسماء الدارجة زي هبلة و عبيطة و شعنونة .. و انا بصراحة بقيت اسيب موضوع الدلع لكل واحد او واحدة على ذوقه او ذوقها .. انا انسانة اؤمن بالديموقراطية آخر حاجة

عمري ؟

عندي 24 سنة و هاكمل المؤبد في 25 فبراير اذا ربنا شاء و ليا عمر ، و اللي هيتلكك في الهدية عشان انا مش موجودة يريت يجيبها و انا هاعرف اخودها ازاي :):) بلاش حجج فاضية ماشي

شغلي ومجالي؟ كان نفسي اكون مضيفة او مذيعة او مهندسة معمارية ، بس مضى قطار العمر و تحطمت احلامي على صخرة الواقع و الحمد لله على الصحة ... انا درست ادارة اعمال في كلية الشعب و حاليا بشتغل في مجال تنظيم المعارض و المؤتمرات .. الشغل لطيف معايا .. صحيح مش كان حلمي بس انا بحاول دايما احب الحاجة اللي بعملها عشان ادي فيها اكتر

نوع شخصيتي؟ انسانة طبيعية جدا ... فيا تناقضات او الناس ممكن تشوفها كده بس انا مش دايما بحسها كده .. سلسة في تعاملي .. مش بعند على اي حاجة بس احيانا نادرة بعند بشدة .. لما بكون على غلط بعترف بده بمنتهى البساطة .. مش معقدة و سهل اني اللي قدامي يفهمني الا لو كان اللي قدامي غبي او بيتغابى .. دايما بلخص شخصيتي في كلمتين .. تدلعني تاخد مني احلى كلام لكن عمري ما باجي بالغصبانية .. كلمني بالعقل و المنطق اتجاوب .. و انا فعلا كده في معظم الوقت :):) اجي بالكلمة الحلوة بس مش معنى كده انه بيضحك عليا فبلاش استغلال ماشي :):)

السفر بالنسبة لي؟ ده كان سبب حبي و حلمي اني اطلع مضيفة .. انا بحب السفر جدا .. طبعا مش طلعت برة الوطن العربي .. بس انا عارفة اني هسافر قريبا ان شاء الى بلاد برة .. بحس السفر ده بياخد الواحد لدنيا تانية و عالم تاني .. بس اللي بيدايقني في السفر ان اللي بحبهم مش يكونوا معايا و ده اللي مكن فعلا يخليني اكره السفر

المود بتاعي؟ حاليا مش قادرة احدد بالضبط .. مبسوطة ممكن .. مضايقة جايز ... فعلا مش عارفة أحدد لأن دلوقتي تحصلي حاجة اتبسط بيها اوي و في نفس الوقت تحصل حاجة تانية تخنقني .. فعشان كده انا حاليا في المنطقة المحايدة ... او يمكن بضحك على نفسي و عارفة مودي بس بستعبط :):):)

وقت فراغك وكيف تقضيه؟ نظرا لظروفي و اني مش موجودة في مصر حاليا .. فوقت فراغي غالبا بقضيه في البيت .. اقرا في كتاب ... اكتب حاجة .. ادخل على النت .. اتفرج على التلفزيون ... اكلم البت راني او صحباتي .. مش بخرج هنا كتير .. فين و فين لما نتجمع انا و صحباتي .. او انزل السوق مع ماما .. الحياة نوعا ما غريبة شوية .. و الناس كل واحدة مشغولة بحياتها .. بس في مصر كانت الحياة و اوقات الفراغ الطف .. كفاية لما كنا بنتجمع و نطلع نركب خيل .. او اروح انا و راني نلعب بينج بونج في النادي أو حتى نفضل في البيت و نفضل نحكي لحد الصبح .. و الحمد لله اليوم عندي هنا مش بيفضل فيه وقت كتير و ده مهون عليا شوية

الاكلة المفضلة؟ انا نفسي هفاني على الكشري بقالي فترة و يمكن عشان مش عارفة اكله هنا و امي بطلت تعمله في البيت ... بحب الجلاش باللحمة المفرومة عشان انا بعمله تحفة .. المكرونة بالباشميل .. محشي ورق العنب ... الكبدة لما بتتعمل بالطريقة اللبناني و يتحط عليها صوص دبس الرمان يا لهوي يا جمااااعة تحفة بجد و معاها التبولة .. الكوسا بالباشميل اللي مش بكلها غير في بيت سيكا صحبتي ... ايه تاني يا بت يا تخينة .. انا زمان كان الاكل هو اساس حياتي .. بس حاليا مش عارفة ليه الاكل بالنسبة ليا بقى من المكملات .. الا لو في يوم كنت رايقة و مزاجي عالي ساعتها بتمزج و انا بعمل الاكل .. نسيت اقولكم اني بعشق سندوتشات الكبدة اللي من على العربيات . قد ايه امي مش بطقني لما بتعرف اني كلت من على عربية في الشارع ... بس انا مش بحرم عادي يعني .. يرضيكوا أحرم نفسي يعني من حاجة بحبها

الصفات اللي اخدتها من ماما و بابا ؟ انا شكلا فيا شبه كبير من أمي .. و كل ما حد يشوفني يقوللي انت نسخة منها و هي صغيرة .. ماعدا شعري فده وخداه وراثة عن بابا حبيبي .. موضوعا بقى .. انا خدت من بابا الصبر و ازاي اسامح ، صلة الرحم حتى لو الناس مقطعاني ، الاعتماد على النفس ( نوعا ما ) ، منساش الواجب حتى لو بيني و بين حد مصانع الحداد ، حب القراءة ، مش سهل عليا اني اطلب حاجة من حد و لو عملتها بطلب الحاجة مرة واحدة و مش بكررها تاني ، مش زنانة ، فهمت منه معنى كلمة الجيش قالك اتصرف :):) و حاجات تانية كتير ، من ماما بقى غير الشكل فانا خدت طيبة قلبها .. مش هقول ان العصبية طبع فيا ، بس على قد ما بصبر ممكن اجي في لحظة و بجد انفجر بس الحمد لله دايما بخلي انفجاري على نفسي و لما بيبقى على حد غير نفسي بحاول دايما اتحكم على قد ما اقدر في عصبيتي .. جايز خدت حاجات تانية بس طبعا ده بس اللي فكراه او يمكن عشان في حاجات مشتركة بينها و بين بابا .. معلش الزهايمر اشتغل

اكتر ست حاجات بحبها؟ أهلي بحبهم جدا خصوصا شيري و راني اخواتي البنات و طبعا طبعا مارو و بيري ولاد اختي و جوزها

بحب اصحابي جدا و دايما بحمد ربنا انه رزقني بشوية اصحاب بمعنى الكلمة و بدعي دايما ربنا يديمها عليا نعمة بحب افرا كتاب او قصة و بطير من السعادة لما تعجبني و مش بزعل لما مش يعجبني المحتوى عشان بكو نعلى الاقل خدت فكرة

بحب المزيكا و فوق كل المطربين بحب منير و فيروز و سعاد حسني بحب المفاجآت و الصدف الجميلة بحب البحر و الورد و الشوكولا و القهوة و ريحة الشيشة و الألوان و المراجيح :):):)

بحبني لما أدور و ابحث عشان اعرف حاجة جديدة او افهم حاجة مش فاهماها

بحب أغني رغم ان صوتي مش حلو و بحب العووود جدا رغم اني مش بعرف العب عليه بحبني اوي لما راني تستلمني و تعمل وشي لوحة رسم و تبدأ في الابداع بالمكياج

بحب ضحكتي لما تطلع من القلب .. بحب اكون وسط الناس اللي بحبهم و نتلم سوا في اي مكان في الدنيا حتى لو هنقضيها على الرصيف .... و يا سلام بقى لو طلبت معايا جنان و شغل العيال و التنطيط ببدع

انا واثقة ان في حاجات اكتر من كده بس كفاية كده عليكم :):)

اكتر 6 حاجات بكرهها؟ بكره التحكم على الفاضية و المليانة .. بكره الظلم سواء لما انا اتظلم او غيري ..بكره الغباء و اللي اكترمنه ان حد يتغابى او يستعبط .. بكره نفسي لما احس اني غلطت في حد و بضايق اكتر لما اللي قدامي يفكر اني عملت كده عن قصد .. بكره الحيرة و لما احس نفسي مش قادرة اعمل حاجة و متربطة .. بكره ان حد يجبرني على حاجة لمجرد انه عارف اني مش عايزة ازعله او اضايقه .. بالنسبة للناس فعمري ما وصلت لدرجة اني اكره حد تقريبا ، يعني ادايق من حد اه بس اكره لأ، و مع ذلك حصلت مرتين بس طول عمري ان في ناس وصلت فعلا معاهم لدرجة الكره ، بكره لما اكتب بوست و مش يطلع التنسيق بتاعه مضبوط

الشغل بالنسبة لي؟ انا بحب الشغل جدا و حت ى لما ببدأ في حاجة مش عارفاه او مش حباها بعلم نفسي ازاي اعملها و ازي احبها

الكمبيوتر والنت؟ مهمين ليا لانهم بيعرفوني حاجات كتير .. و طبعا كفاية ان الكمبيوتر دلوقتي من حلقات الوصل بيني و بين اقرب الناس ليا في الدنيا

من سترسل لهم التاج؟ أعتقد ان كل اللي اعرفهم عدى عليهم التاج .. يعني محدش سابلي مجال عشان امرره لحد .. بس ممكن اعديه على كل من

وردة سودة .. شيماء صاحبة الصراحة خنقة ... و شيماء التانية صاحبة صخب أنثى .. دول اللي انا فاكراهم دلوقتي .. بس مفيش مانع ان اي حد معدي ممكن يجبر بخاطري و يجاوب

------------------------------------------------------------------------------------

متهيألي انا كده ممكن يخلى سبيلي بضمان اجاباتي و نوعا ما صراحتي .. ازاي كده انا رغيت كتير اوي مش فاهمة الناس هتقرأ ده كله ليه .. ما علينا انا عملت اللي عليا بقى و خلاص و اللي عايز يقرا يقرا و اللي مش عايز و هيزهق مش هالومه .. و بينا ميعاد تاني على المصطبة